Stablesimentu di CKB:

Kolegio Ehekutivo di Boneiru a establesé Sentro pa Empresanan Chikí lesa “Centrum Kleinbedrijf Bonaire” (CKB). E akto aki a wordu ehekutá hasiendo uso di e Memorandùm pa Asosashon di un Fundashon na ofisina di Notario Publiko A.P.Knuf riba 20 April 1999. Bestuurscollege a aprobá e stablesimentu i finansiamentu di e Fundashon riba 22 di Desèmber 1998. E meta prinsipal di CKB ta pa promové i stimulá e empresanan mikro i chikí den e sektor empresarial riba e isla di Boneiru.

Di akuerdo ku e Memorandum, e fundashon lo realisá su metanan di e siguiente forma:

• Implementá e Programa di SESNA riba e isla di Boneiru;
• Ofresé Entrenamentu i Servisionan konsultivo den forma individual òf durante sekshon di entrenamentu na grupo;
• Fungi komo un entidat ku ta avisá i konsehá Gobiernu Insular riba tópikonan ku ta konserní mundu empresarial en general pero en partikular empresanan chikí i mikro.
• Formalisá lasonan di koperashon ku otro instansha o persona (nan) ku tin metanan similar ku esun di CKB.

For di e momento ku a apuntá un mènedjer na CKB resultadonan konkreto ta tumá luga. Riba un base strukturá CKB ta organisá anochi di informashon pa interesádonan. Diferente asistensia den forma di konsultá a keda duná na entreprenùr di empresanan mikro i chikí na Boneiru. Banda di esaki CKB a tene un enkuesta di Merkadeo bou di Empresanan mikro i chikí pa asina inventarisá nesesidatnan ku ta eksisti bou di nan. A base di e inventarisashon CKB lo por yuda e empresanan mas dirigi segun nan nesesidatnan. CKB a kumplí ku tur e eksigensia (nan) ku SESNA ta preskribí. E parti operashonal di CKB ta funkshoná totalmente. Diferente ehersisio a wordu kompletá dor di e Tim di Maneho di CKB. Algun ehèmpel di esaki ta entregá di nan Plan di Maneho riba termino largu ( 5 aña) i nan promé Plan General di Trabao. Banda di esaki tabata tin entregá tambe di un Programa di Trabao pa medio di EDF (European Development Fund) pa haña aprobashon di e Hunta di Direktiva di CKB, Outoridat Teritorial “Territorial Authorizing Officers” (TAO) i di e Delegashon di Komunidat Europeo.

Ophetivo i Metanan di CKB:

CKB tin komo ophetivo e siguiente metanan:

• Pa proveé entrenamentu i sosten na empresarionan mikro i chikí riba un base regular i duradero pa asina nan por atkiri abilidatnan speshal ku ta esensial riba e tereno empresarial;
• Elevá e kalidat di MSEs su organisashon di sosten pa asina por duna servisionan di entrenementu i konsulta na nivel;
• Promové i mehorá MSEs su sistema i struktura i kader di trabao huntu ku Gobiernu Insular.

Ku sosten di SESNA i asistensia partikularmente di su konseheronan, CKB a logra di bira un instansha profeshonal ku ta brinda servisionan konsultativo i entrenamentu empresarial na nivel. Servisionan ofresé dor di CKB ta ekivalente na konsultante (nan) internashonal ku tin nan mes bufete riba e tereno di Empresa i Maneho. CKB sinembargo ta konsentrá su aktividatnan prinsipalmente riba empresanan chikí i mikro (MSEs). CKB tin un enkadenashon amplio di konseheronan di SESNA i entrenadónan kwalifika. CKB tin un bon relashon ku bankonan i ta gosa di un reputashon ekselente. Su meta ta pa krea un relashon di trabao ku bankonan ku ta basa riba konfiansa, ekspertisio i kompreshon mutuo.

Intenshon ta pa ora e instituto di CKB stabilisá su mes komo un Sentro di Entrenamentu i Servisionan Konsultivo, ku lo e ta den e posishon pa envolve su mes den otro proyektonan.

Programa di CKB, Propósito i Resultadonan:

CKB kier alkansá na final di e 5 añanan di Implementashon di e Programa e siguiente resultadonan:

• MSEs a oumentá nan ganashi;
• MSEs ta bon informa tokante tur aspekto legal ku tin di haber ku e mundu empresarial, ta na altura di e proseduranan i produktonan ku ta riba merkado;
• Hasi institutonan finansiero aksesibel pa empresa chikí i mikro por bin na remarke pa kredito;
• Meta general di SESNA ta pa konservá e 3000 kuponan di trabao riba merkado laboral i krea 600 trabao adishonal den e empresanan mikro i chikí
• Alkansá un máksimo di 15 konsehero profeshonal ku ta duna entrenamentu i konseho segun nesesidat individual di kada negoshi chikí òf mikro. CKB a stipulá den su plan di maneho ku pa por funshoná optimal un minimo di 3 konsehero ta nesesario.
• Entrená rònt di 20 entrenadó pa medio di e programa “train the trainers” ku na nan turno mester entrená entreprenùr segun nesesidat di nan empresa. CKB mester un minimo di 5 entrenadó profeshonal pa por ehersé optimal su metanan;

E Hunta di Direktornan ta konsistí di 5 miembro ku ta bin for di e sektor gobernamental i e sektor privá. E hunta di direktornan ta enkargá ku supervishon di CKB. E hunta ta operá independiente i mester soru pa tur aktividatnan desplegá i tur desishonan tuma mester ta no-politiko. E hunta di direktornan mester guia CKB na un posishon finansiero solido i un instituto profeshonal di reputashon haltu.

E tim di maneho diario di CKB ta konsistí di un mènedjer i su asistente. Nan ta wordu asistí dor di konseheronan di SESNA ku ta duna asistensia riba termino korto òf mas largu. E tim di maneho diario di CKB mester responsabilisá nan aktividatnan di trabao na e Hunta di Direktornan. Den estrecho koperashon ku Hunta di Direktornan e tim di maneho diario di CKB ta determiná i sumamente motivá pa logra nan metanan stipulá.Eksistensia di e fundashon na Boneiru sigur lo yuda kontribuí na e desaroyo sosio-ekonomiko en general riba e isla di Boneiru.

Tim di Maneho:

E mènedjer di CKB ta esun responsabel pa e operashon diario i ehekushon di e Programa di Trabou anual di EDF. E mènedjer mester tin un kòrikulum profeshonal. Banda di e formashon akadémiko aspektonan personal manera motivashon i integridad ta esensial pa e funkshon.

E mènedjer ta responsabel pa implementashon di e Plan Strategiko ku ta basa riba e prome 5 añanan di operashon. E mester presentá e plan aki pa aprobashon na e Hunta di Direktornan kaminda e ta hasi nan atento riba prioridatnan, paketenan di servisio ku ta ofresé na klientenan i e struktura di preis. Teminologia,definishon i reglanan den e organisashon tambe ta wordu presentá na e hunta di direktornan.

Kwalifikashon i preparashon profeshonal di e ménedjer ta buta ku e por ofresé klientenan di CKB servisionan ku ta relevante i apropiá. Lo e desaroyo paketenan di servisio ku ta diseña speshal konforme nan prioridatnan. E asistente di e mènedjer lo traha den estrecho koperashon ku e mènedjer pa asina yuda garantisá ku tur e metanan propone dor di CKB lo wordu realisá.

E konseheronan di SESNA lo sostené i guia e mènedjer i su asistente ora ta nesesario pa nan tin bon kader pa ehekutá nan tareanan manera kordiná i duna entrenamentu òf servisionan di konsulta na nan klientenan. E tim diario di CKB lo risibí asistencia ku implementashon di e proseduranan di e Programa di SESNA.

Lokalidat i Fasilidatnan di CKB:

E ofisina di CKB ta situa den un edifisio moderno den Sentro di Siudat loke ta hasi CKB aksesibel pa tur su klientenan. E ofisina ta bon ekipá ku teknología moderno. CKB a laga instalá un server ku un konekshon T-1 pa asina garantisá un komunikashon sin interupshon.CKB ta disponé di dos sala grandi ku ta wordu usá pa tene workshop i entrenamentu. Den futuru serkano CKB lo tin un sala di literatura, kaminda klientenan por enrikesé nan konosementu empresarial. Nan lo tin akseso na publikashon i artikulonan ku ta relevante pa empresa mikro i chikÍ.

CKB kier pa e ofisina ta aksesibel pa tur hende ku ta buska informashon. Tur petishon ku drenta ta haña atenshon mas lihé posibel. CKB ta evaluá e petishon di e entreprenùr i ta analisá den un kuadro realistiko kon por asistí e entreprenùr den esaki.

Esaki lo krea un relashon di konfiansa entre kliente i CKB. E ofisina di CKB ta habri durante oranan di ofisina pero tim di maneho di CKB ta dispuesto pa reuni ku klientenan for di oranan di ofisina si esaki ta nesesario.

CKB Atministrashon i Organisashon:

Tim di maneho di CKB a hinka e parti di atministrashon i kontabilidat di e organisashon mas simpel posibel den otro.

CKB a optené via di e budget di EDF dos kompìuter ku software segun spesifikashon di e plan di trabao. E kompìuternan lo wordu usa pa hasi tareanan diario di atministrashon general di CKB.

CKB ta mantené un atministrashon sentral di tur nan klientenan. CKB a diseña un formulario kaminda klientenan ku bishita CKB pa promé bes mester jena. Ku e registrashon aki CKB kier logra un struktura di trabao efisiente kaminda nan ta haña akseso direkto i rapido na tur e datosnan i asina yuda nan klientenan mas mihó ku nan proyektonan. Dor di un registrashon sentral ta bira posibel pa link e datosnan ku otro programa. CKB su Konsehero Finansiero i Tékniko lo link e datosnan aki ku esun di kontabilidat. E konsehero a skohe pa traha ku e programa di Quick Books Pro 99 pa hasi e atministrashon di kontabilidat pa e unidatnan di SESNA. E programa aki ya a wordu instalá na CKB i lo wòrdu adaptá na e nesesidatnan di CKB. E programa di kontabilidat aki por wòrdu usa tambe pa asistí klientenan. CKB tin komo un di su metanan pa preservá mas o menos 300 kuponan di trabao i krea 60 trabao adishonal den e sektor mikro i chikí. Ku esaki den mente CKB a reservá un parti di e formulario pa inkluí datosnan ku tin di haber ku empleo lesa situashon laboral.

CKB ta stipulá tarifanan pa servisionan a base di e sistema di ora. Mènedjer a diseña un formulario kaminda ta registrá e orarionan ku konseheronan/entrenado ta dediká na entrenamentu, atministrashon i trabaonan konsultivo pa klientenan di MSEs. E formulario ta un bon método pa hasi maneho di tempu pa proyektonan mas efisiente i na mes momentu ta trese transparensha.

E servisionan básiko ku CKB ta ofresé na su klientenan ta lo siguiente:

• Servisio Konsultivo pa Empresanan;
• Servisio di Entrenamentu;
• Servisionan di Informashon

E servisionan ariba menshoná ta wordu duna na un preis redusí kompara ku e promedio di preis en general riba merkado. CKB ta hasi esaki pa asina duna entreprenùr nan ku un entrada abou un enkurashamentu pa hasi uso di e Servisio di Informashon di CKB. E servisionan aki lo wordu duna mas tantu posibel dor di e staf diario di CKB. Kaminda esaki no ta posibel CKB tin sub-kontrakto firma ku konseheronan i entrenadonan ku ta wordu yama pa bin duna servisio na e klientenan.

CKB ta ofresé Servisionan di Konsulta segun nesesidat individual di kada kliente.

E servisionan ku CKB huntu ku su konseheronan por ofrese tap or ehempel e siguiente produktonan:

• Plan di Maneho pa Empresa
• Servisio Konsultivo
• Servisio Konsultivo riba tereno di Merkadeo
• Atministrashon i Kontabilidat
• Maneho di Inventario
• Atministrashon di Sueldo
• Servisionan di Bufete di Abogado.p.e. gobièrnu of instituto finansiero
• Maneho Finansiero
• Presupuesto i Maneho di Fluho di Plaka (Likides)

E Tim di Maneho di CKB i e Konseheronan ku ta presta nan servisio na CKB a haña banda di mas mes formashon profeshonal un Sekshon di Entrenamentu serka Konseheronan di SESNA pa asina garantisá ku tur e konseheronan mara na CKB ta riba e mes un liña di preparashon pa asina por asistí e klientenan den e sektor mikro i chikí. E konseheronan ta traha part-time i riba un base liber ku CKB.

CKB ta kompilá i analisá datosnan riba e tereno di empresanan mikro i chikí. Dor di implementá e método aki CKB por presentá datosnan ku ta struktura,konkreto i konfiabel. Den e siguiente grafik por mira e kantidat di Aserkamentu di Entreprenùrs na e Instituto di CKB.

Tabel 1:Grafik di Entreprenùr buskando Asistensia di CKB (download den e format di pdf)

Entrenamentu Empresarial:

CKB ta organisá entrenamentu klasikal pa klientenan ku kier bai kuminsá nan propio negoshi of pa entreprenùr ku kier haña mas konosementu riba e tereno empresarial.Ta eksigí konosementu empresarial basiko. E entrenamentu lo wòrdu duna na un nivel inspiratorio ku lo motivá e empresario mikro i chikí pa paga pa e servisionan di CKB. Pa garantisá efektividat di e entrenamentu nan CKB a opta pa duna lès den gruponan chiki segun tópiko. Pa menshona algun p.e. Maneho Finansiero, Merkadeo, Strategia pa kuminsa Negoshi, i Organisashon Atministrativo. E método ku ta wordu usa durante Entrenamentu Empresarial ta basa riba teoria konosí i praktiká den e mundu empresarial. Asina CKB kier garantisá e kalidat di entrenamentu. E teoria, metodo i terminologia lo ta simpel i consistente. Algun adaptashon a wòrdu hasi konforme nesesidatnan lokal.

Entrenádonan, konseheronan inklusivo e Mènedjer di CKB ta kwalifiká pa duna Entrenamentu Klasikal. E konseheronan di SESNA lo duna asistensia i entrenamentu na e Tim di Maneho di CKB, Konsehero i Entrenadonan ku a firma un konbenio ku CKB. Konhuntamentu lo desaroya un pakete kompiutarisá ku ta akapará diferente instrumentunan empresarial ku ta basiko i nesesario den un negoshi. Algun di e instrumentonan aki ta p.e. kontabilidat i sistemanan di planifikashon pa spesifikamentu sierto empresanan mikro i chikí .

Servisionan di Informashon:

CKB tin komo un di su metanan pa duna informashon Alkaso, Relevante i Konfiabel na empresarionan ku pidi esaki. Kaminda e petishon ta hopi spesifiko i CKB no tin e informashon internamente e ta hasi uso di su kontaktonan lesa “netwerk” ku lo asistí ku e informashon òf dirigi na unda CKB por haña e informashon pa asina e por yuda su klientenan mihó.

CKB lo duna asistensia riba petishon di Gobièrnu Insular i en partikular di e Departamentu Ekonomiko i di Labor. E asistensia aki ta basa solamente riba promoshon di e sektor di Empresa Mikro i Chikí.

Konsehonan duná dor di CKB ta basa riba eksperensha den vèlt di e empresanan den sektor mikro i chiki. CKB konhuntamente ku e konseheronan di SESNA a desaroyá paketenan pa empresarionan. Tin pakete pa e entrepenùr ku tin intenshon di kuminsa negoshi òf ku a kaba di kuminsa un negoshi. Banda di esaki tin pakete kon pa mehorá nan produkto i servisio pa nan klientenan. Den e paketenan aki por enkontrá informashon tokante kon pa traha un Plan di Merkadeo, Plan Finansiero, Leinan i reglamentunan di Impuesto pa Empresarionan, Siguridat Soshal, Salubridat, Registrashon i Leinan Laboral.

Diferente instrumentu i mètodo (nan) pa planifikáshon den negoshi a wòrdu desaroya dor di CKB. Esaki ta konsistí di instrumento/metodonan ku ta praktiko diseña speshal pa yuda e empresarionan den e diferente sektornan di empresanan mikro i chikí. Un ehempel di esaki ta un programa di kompiuter ku e struktura kla prepará kon pa traha un plan di maneho pa un empresa den un sierto sektor. E empresario mester adaptá esaki na su propio negoshi.. Dor di apliká e instrumento aki e empresario ta bira konsiente riba puntonan ku e mes no a tene kuenta kune pero ku ta esensial den e sektor. Por ehempel e Hotelero lo wordu konsientisá riba aspektonan di inventario. Pa e empresa ta eksitoso mester tin un bon maneho i kontrol di inventario. Planifikashon tambe ta un punto ku CKB i konseheronan ta buta hopi atenshon na dje. Hasiendo analisis ta evita e empresario di komete erornan ku por resulta desastroso pa su negoshi. Pesei CKB ta stimulá tur entrepenùr pa hasi uso di nan servisionan pa asina lográ ku Boneiru tin empresarionan eksitoso den e sektor mikro i chiki.

Pa mas informashon tokante e sektor mikro i chiki por, download e siguiente topikonan:

Bai bek ariba