Entrevista

CKB di un forma direkto tin relashon di trabou ku diferente
organisashon na Boneiru. E kontaktonan ku e organisashon nan ta
sosodé riba un base regular of asta diario. Seguidamente nos ta sera
konosí pa medio di entrevista ku miembronan di Gerensia di CKB,
miembronan di Hunta di Direktiva i miembronan di otro
instituto/organisashon importante den nos komunidat.

Leonard U. G. Domacassé, Senior Account Manager, Maduro & Curiel's
Bank (Bonaire) N.V.

P: Ki relashon di trabao bo tin ku CKB?

K: Ami ta e persona enkargá ku kordinashon atministrashon di e fondonan di SESNA pa MCB. Ora ku ora un fiansa wordu otorgá ami tin komo parti di mi tarea pa sòru pa e suma aki wordu di buk korekto riba e kuenta di SESNA. Mi ta kolekshoná tur datos i prepará e rapòrt pa e ofisina di SESNA na Kòrsou. Aplikashon pa fiansa ta wordu atendé dor di e Ménedjer di Kuenta i desishon final si ta otorgá un fiansa si of no ta den man di banko dor ku MCB ta tuma 50% di riesgo ku e tipo di fiansa aki. Ta bin aserka ku Banko no por pidi kolateral pisa (garantia) pa e tipo di fiansa nan aki. Banko ta mantené pa e tipo di fiansa aki un límite na normal FL 50,000, aunke den sierto kaso banko por otorgá i soru pa finansiamentu di un montante mas haltu kaminda esaki ta nesesario. E areglo di fiansa aki ta bentahoso pa e entreprenùr ku kier kuminsá su propio negoshi. Kondishon ta masha faborabel (interes 9%, i tin te ku 6 luna periodo di grasia).

P: Den e último 18 lunanan ku CKB ta operá kompleto kuantu petishon pa fiansa a keda otorgá dor di CKB/MCB?

K: Riba di 20 petishon pa fiansa a wodu otorgá e periodo aki i ta trata di fiansanan den tur ramo di negoshi manera: garashi pa drechá outo, bendementu di kòmpiuter, sambuyamentu, kriadero di galiña, diferente restorant, snèk, i un negoshi di kosé i bòrdamentu. Por bisa ku kasi 60% di e negoshinan aki tin laso di forma direkto ku sektor di turismo.

Nota: Aparte ku CKB ta ofrese servisionan di entrenamientu (kurso), konsejo empresarial I informashon “kwal ta e obhetivo di CKB”denter di e programa di SESNA, tin tambe e komponente finansiero. Den e komponente finansiero ta eksisti e posibilidat ku empresario(nan) local, ku asistensia di CKB, por bini na remarke pa risibi un fiansa te ku un maximo di Nafls. 50.000. Ariba menshona ta algun di e empresario(nan) local ku a risibi un fiansa for di es komponente finansiero di SESNA durante e programa di trabow # 3.

Sr. Domacassé , a nasé na Bonaire, a regresa “kas” bek 3 aña pasa despues di a studiá na Kòrsou i Hulanda i a traha pa 2½ aña na MCB Kòrsou.

Bai bek ariba

Carmelita Gerling-Samijadi, Mènedjer Asistente, CKB

P: Kiko ta bo tareanan na CKB?

K: Mi ta emplea na CKB for di desèmber 2001. Mi ta enkargá ku e atministrashon kompletu di e fundashon. Mi ta kordiná tambe e kursonan pa entrenamentu di entreprenùr, Banda di esei mi ta asistí Anthony i ta fungi komo su man drechi i mi ta remplasé ora e no ta na ofisina. Dor di mi trabao mi tin kontakto ku hopi hende i mi ta kontentu ku mi por asistí e klientenan ku ta aserka CKB i danki Dios den mayoria kaso nos por yuda nan.

P: Bo por spliká kon e proseso ta bai ora ku un kliente pa promé bes aserka CKB pa yudansa?

K: Den e promé kontakto mi ta sinta huntu ku nan i mi ta puntra nan ki ta nan plan di negoshi i meta. Nan ta aserka CKB hopi bes pa haña informashon tokante e servisionan ku CKB ta ofrese. Den mayoria kaso nan ke hasi uso di un òf mas servisio manera: sigi kursonan, haña asistensia i konseho di nos konseheronan riba tereno di atministrashon di negoshi òf apliká pa un fiansa pa medio di eprograma di SESNA. CKB ta mantené un relashon di trabao ku ± 15 konsehero di negoshi ku ta biba aki na Bonaire. E konseheronan di negoshi ta traha ku klientenan di CKB pa yuda nan ekspandé nan negoshi òf kuminsa nan propio negoshi. E gastunan di e kursonan di entrenamentu ta wordu parti entre e kliente (30%) i CKB (70%), ekskuí OB*. E programa di SESNA tin hopi benifisio i ta disponibel pa empresanan mikro i chikí na Boneiru.

* Pa otro tipo di entrenamentu ku no ta direktamente liga ku hasimentu di negoshi pero ku ta kontribuí na mantené kuponan di trabao óf ku ta rikesé e nivel di produkshon (efisiensa) di e persona envolví. E gastunan lo wordu reparti 50/50. Pa servisionan Konsultivo pa empresa e repartishon di gastu pa empresanan mikro i chikí ta 60/40.

Sra. Gerling-Samijadi a bin biba na Boneiru na aña 1996 for di Sürnam. E ta kasá i tin tres yu, nan ta gosa inmensamente na Boneiru. Carmelita por asistí klientenan di CKB den tres idioma: Ingles, Papiamentu, i Hulandes.

Bai bek ariba

Marjolein Hayden, Direktor di “Antillean Wine Company” i miembro di Hunta di Direktiva di CKB representante di Bonhata (Bonaire Hotel and Tourism Association)

P: Kiko ta e relashon entre Bonhata i CKB?

AK: Aktualmente CKB a kaba di sera un akuerdo ku Bonhata kaminda CKB lo pone fondonan disponibel pa entrenamentu di empleadonan di empresanan ku ta miembro di Bonhata i ku ta traha den e sektor di hospitalidat manera e.o. restorant, limpiesa i trabounan di mantenshon. E kursonan aki ta programa pa kuminsá den 2005 i ta den e proseso di preparashon/organisashon di e kursonan.

P: Bo ta kere ku empresa mikro i chikí ta hasi bon uso di e servisionan ku CKB ta ofresé aki na Boneiru?

K: Sigur. Mi mes komo empresario a hasi uso di e servisionan di CKB. Bo tin ku djis bishitá CKB i hasi bo petishon pa asistensia di bo negoshi. CKB ta ofresá un servisio kaminda tur empresario por kumpra ora, nan ta yame “kredito” kaminda den futuro ora ta nesesario bo por hasi apelashon riba nan konseheronan pa servisionan konsultivo. Personalmente mi ta haña ku e konseho ku mi a risibi serka CKB tabata masha bon mes i a yudami ku maneho di mi propio negoshi. E instituto di CKB a bin pero ta abo (komunidat) mester hasi uso di dje, korda hasie!

Sra. Hayden ta doño i direktor di Antillean Wine Company. E ta bin for di Hulanda, Sra. Hayden a establese su mes na Boneiru na Juli, 2000, i ta hopi aktivo den e komunidat Boneriano. For di aña 2003 e ta aktivo den e Hunta di Direktiva di CKB.

Bai bek ariba

Paulina E. Martis van Arneman, Hefe interino di DEZA (Departmentu Ekonómiko i Asuntunan di Labor) i miembro di e Hunta di Direktiva di CKB representante di Gobièrnu.

P: Bo por a dunami un relato breve tokante e Konferensiá di Invershon ku ta bai tuma luga aki na Boneiru i kon e idea aki a nasé?

AK: Durante un reunion na aña 2002 entre e presidènt di CKB (e tempu aya Sr. Burney el Hage) i e mènedjer ku ta enkargá ku ehekushon di e programa di SESNA ku ta Sr. Anthony Cecilia a keda disidí ku e mènedjer lo buska e fondonan nesesario hasiendo uso di tur ekspertisio ku ta na su alkanse pa asina por logra pa organisá Boneiru su Promé Konferensiá di Invershon.

Boneiru su posishon geográfiko, bon servisio finansiero, infrastruktura, stabilidat polítiko i sistema di presupuesto faborabel ta hasi Boneiru sumamente atraktivo pa invershonista. Tin un demanda grandi pa tur sorto di invershon aki na Boneiru. Pa por inverti aki na Boneiru industria tin ku kumplí ku algun kondishon basiko. E kondishon aki ta referi na nos Medio Ambiente. Industrianan mester sigi e reglamentunan i kumplí ku nan i asina yuda sostene i mehorá e kalidat di Boneiru su producto ekonómiko.

Gobièrnu di Boneiru a kuminsá ku un proseso struktural di drecha e klima di invershon i na mes un momento stimulá kompetensia, saliendo for di e filosofia ku sektor privá ta e motor di nos ekonomia.

Diferente insentivo a wordu introdusí pa stimulá potenshal invershonista pa nan por kuminsá nan negoshi aki na Boneiru. Algun di e insentivo nan ta: aselerá desprecio, redusí impuesto riba ganashi, impuesto liber (tax holiday), of permitnan pa invershon. E sektornan mas importante pa hasi invershon ta: Turismo, Desaroyo di Empresanan medio i chikí, desaroyo di Aeropuerto i di Porta Marítimo, Komersio Elektroniko, Proyektonan Ekologiko, Proyektonan ku orientashon riba salubridad, Agrikultura, Kriadero, Piskeria i Telekomunikashon tambe ta wordu considera importante.

P: Kiko bo persona ta hasi direktamente komo miembro di e Hunta di Direktiva di CKB i kiko ta bo tareanan?

K: Den un par di palabra mi tareanan ta di supervisa i vigilá (chèk) tur e aktividatnan di CKB pa nan kana manera ta para den e Akuerdo Finasiero di e programa di SESNA i den e plan stratégiko di Maneho basa riba un periodo di sinku aña.

Sra. Martis ta empleá na DEZA for di aña 1995, i ta okupá aworaki e funshon di Hefe interino di e departamentu Ekonómiko i di Asuntunan di Labor. E ta presidènt di e Hunta di Direktiva di CKB i ta karga e responsabilidat ku e funshon aki ta trese kune manera: “Impress Account Holder”. Dor ku CKB su meta prinsipal ta pa stimulá empresan chikí i medio (SMEs), DEZA sigur ta un miembro aktivo pa asina por yuda kontribuí na nomber di Gobièrnu pa asina garantisá un kresementu supstansial den ekonomia i sigurá kontinuidat i eksistensia den e sektor di MSe.

Bai bek ariba

Evert L. Piar, Managing Director, Maduro & Curiel's Bank (Bonaire) N.V., CKB Vice Presidènt representante di Asosashon di Bankonan na Boneiru.

P: Den ki kapasidat bo ta envolvi ku CKB?

K: Mi funkshon ta vice presidènt di CKB i mi ta representá e Asosashon di Bankonan Boneriano. Mi ta un di e fundadornan di e fundashon di CKB. Banda di e reunion nan mensual ku nos tin ku e Hunta di Direktiva mayoria di mi tareanan ta di supervisá e gerensia diario di e fundashon. E funshon di vice presidènt ta rekeri ku mi tin ku revisá i firma dokumentonan, chèks i ehersé otro tareanan atministrativo.

P: Den bo opnion, kua ta e funshon di mas importante ku CKB ta ehersé? Bo ta kere ku e hendenan ”komunidat” ta konsiente di e posibilidat i benefisionan ku CKB por tin pa nan?

K: Den e ultimo 18 lunanan ku a pasa mi por bisabao ku CKB realmente a bira 100% operashonal, e instituto a asistí entre 20 pa 25 kliente ku finansiamentu pa negoshi na un interes ku nan realmente por paga i asina kuminsá nan propio negoshi. Dor di asistí e empresario ku e fasilidatnan pa kana e prosedura pa bin na remarke pa un fiansa CKB ta bira direktamente responsabel pa garantisá ku mas negoshi lo yuda e stabilidat ekonómiko di Boneriru. E ròl ku CKB ta hunga den asistí ku e proseduranan pa finansas ta suplimentario kompara ku di e mundu bancario, pero definitivamente ta importante pa e isla. Mi ta di opinion ku nos por mehorá i evaluá di nobo nos forma di aserka of duna informashon na komunidat. Esaki ta un aspekto ku nos lo diskutí den e Hunta di Direktiva kon nos lo mester hasie den futuru. Últimamente CKB ta gosa di bon kobertura serka prensa local i mi ta kere ku tur hende na Boneiru ta konsiente di eksistensia di CKB komo instituto pero ku no ta totalmente komprendibel pa nan kiko tur e posibilidatnan ta ku CKB tin pa ofresé. Esei ta loke nos ta bai trata di mehorá.

Sr. Piar ta “Managing Director” di Maduro & Curiels Bank (Bonaire). Sr. Evert a djòin MCB na Juli 1967. Despues di algun aña trahando ela bira Mènedjer na aña 1978 i despues na februari 1990 ela bira e “Managing Director” te ku dia di awe. E tabata envolví den lantamentu di diferente fundashon i gruponan di servisiomentu aki na Boneiru manera:“Rotary”, “The Bonaire Businessmens Association” i Ofisina di Turismo. E ta hopi envolvi den aktividatnan sosial i kultural na Boneiru i ta miembro di e Hunta di Direktiva di CKB for di fundamentu di CKB riba Juli 1, 1999

Bai bek ariba